«Jӱрӱмниҥ Јолы» газет 2009-2015 jылдарда аҥылу экономикалык зона деп тӧзӧлгӧн «Алтайская Долинага» чыгарылган 2 миллиард 800 миллион салковой акчаныҥ канчазы алтайлап, «карынга», орустап, «взяткага» барды не деп бичиген эди. Ӧткӧн неделеде бир кычыраачыбыс телефон согуп, «Россия ичинде «Алтайская Долина» ошкош объекттерге чыгарылган акчалардаҥ орто кемиле 15 проценти уурдалат» деп jетирген. Оныҥ сӧзине бӱдӱп, чоттозобыс, «Алтайская Долинадаҥ» распил, откат ла заноско бодоштыра 420 миллион салковой акча барган болордоҥ айабас? 

Кӱӱк айдыҥ 27-чи кӱнинде В.Путин аҥылу экономикалык зоналарды jаҥыдаҥ тӧзӧбӧзи, 10 ОЭЗ jабылары ла арткандары талаларга берилери керегинде jакару бергени мынаҥ ары «Алтайская Долина» тудулбазын jарт керелейт. А.Бердниковтыҥ башкарузы оны кӧдӱрип болбозын бастыра улус оҥдоп jат ине.