Кичӱ изӱ айдыҥ 18-19 кӱндеринде Оҥдой аймактыҥ Јоло јуртыныҥ Кабайлу-Межелигинде Эл Ойынныҥ атла маргаандарыныҥ финалы ӧткӧн. Маргаандардыҥ јеҥӱлерин эмдик ӱредишле – Улаганныҥ, «Кӧк-Бӧрӱле» – Јолоныҥ, ат јарышла – Кан-Оозыныҥ командалары алгандар. «Аргымактыҥ маҥында» јеҥӱни Беш ичинеҥ Могулчиндердиҥ јӱгӱрӱги алган, маҥтаткан кижи – Адар Кынов, Экинурдаҥ.

Кӧп улус Эл Ойынды эки јарып, аттыҥ маргаандарын Јолодо ӧткӱргенин, бир јанынаҥ, јастыра керек деп чоттойдылар. Темдектезе, Горно-Алтайсктагы байрамга ыраак јердеҥ келген айылчылар эмдик ӱредишти, «Кӧк-Бӧрӱни», ат јарышты ла «Аргымактыҥ маҥын» кӧргӱлебезе, алтайлар атту-чуулу јылкычылар болгондорын канайда таныйтандар?..
Экинчизинде, кӧп улустыҥ јаратпаган база бир темдеги – маргаандардыҥ ачылтазында Башкаруныҥ адынаҥ уткуулду сӧс айткан Наталья Екеева сценага джинсы штанду чыкканы болды.
Мыны кӧргӧн улус «Јажы јаанап калган алтай эпши чегедеги јок болгой, тӱнек эмезе јӱкпе не кийип албаган» деп айдыжадылар…